Xorazmdagi paxta zavodida yong‘in sodir bo‘ldi

Xorazm viloyati Xiva tumanidagi paxta zavodda 30-mart kuni yong‘in sodir bo‘ldi. FVV axborot xizmati holat yuzasidan munosabat bildirdi.

Ma’lum bo‘lishicha, shu kuni 17:07 da “Sapcha” mahallasidagi paxta qabul qilish va paxtani qayta ishlash zavodi hududidagi 11 ta paxta g‘aramining ustki qismida yong‘in sodir bo‘lgani to‘g‘risida tuman FVBga xabar tushgan.

Hodisa sodir bo‘lgan joyga 14 ta yong‘in-qatqaruv ekipaji, 12 ta yordamchi suv tashish avtomashinasi jalb qilingan. Yong‘in 18:03 da o‘rab olinib, 19:20 da o‘chirilgan. Voqea joyiga viloyat hokimi o‘rinbosari, viloyat FVB boshlig‘i va mas’ul xodimlar chiqqan. 

Yong‘in oqibatida 11 ta paxta g‘aramining yuza qismida taxminan 2500 kilogramm paxta yongan va yong‘indan 2 ta paxta g‘arami saqlab qolingan. Voqea joyida viloyat hokimining o‘rinbosari boshchiligida yong‘in o‘chirish shtabi tashkil etilgan. Yong‘in sababi va zarari aniqlanmoqda.